બે ગ઼ઝલ

શબ્દ કે અર્થ કૈં પૂરતું ના પડે,
કાવ્યમાં શું ઢળે, तेरे आने के बाद ?!

         તું અહીં, તું તહીં, તું તહીં, તું અહીં,
         ક્યાંય ‘હું’ ના મળે तेरे आने के बाद.

ઉર મહીં ‘ઊર્મિ’ તું, મારો પર્યાય તું,
તું બધે ખળભળે तेरे आने के बाद.

                  (૨)

આભ ઝરમર ઝરે तेरे जाने के बाद,
રોજ પીંછાં ખરે तेरे जाने के बाद.

                  સ્તબ્ધ સૃષ્ટિ સકળ ને અકળ સ્તબ્ધતા,
                  ના હવા મર્મરે तेरे जाने के बाद.

મેં મને ખોળી પણ ક્યાંયે હું ના મળી,
શૂન્યતા થરથરે तेरे जाने के बाद.

                  તારું ચાલ્યા જવું- એક પ્રસવયાતના,
                  કાવ્ય કૈં અવતરે तेरे जाने के बाद.

તું નથી, તું નથી, તું નથી, તું નથી,
તું બધે તરવરે तेरे जाने के बाद.

                   ‘ઊર્મિ’ કેવી તરંગી હતી પણ હવે-
                    ના જીવે, ના મરે तेरे जाने के बाद.

સુશ્રી મોના નાયક ‘ઉર્મિ’ : સંપર્કઃ naikmo@yahoo.com  \ Mobil.No. ++ 973 471 5344